Ыам ыйын 3 күнүгэр Суотту нэһилиэгин Аҕа баһылыга В.П.Баишев, Уус Алданнааҕы техникум директора А.В.Стрекаловскай уонна “Доҕордоһуу” түмэл директор А.С.Охлопков тэрийбит Улуу Кыайыы 80 сылыгар анаммыт саахымакка, биирдиилээн бастыыр иһин күрэхтэһии бэрт хатыһыылаахтык ааста. Күрэхтэһиигэ Суоттубут күүстээх саахыматчыттара бары кэриэтэ оонньоотулар. Ол курдук туур лидердэр уларыйан истилэр, эрбии биитин курдук эристилэр. Тиһэҕэр нэһилиэк биир бастыҥ оонньооччута С.К.Николаев очко аҥаарынан чорбойон бастаата, иккис миэстэни быйыл бэтэрээннэргэ республикаҕа бастаабыт С.Е.Заровняев, үһүскэ нэһилиэкпит ааспыт сыллааҕы чемпиона А.В.Стрекаловскай таҕыстылар.

Кыайыылаахтарга Аҕа баһылыкпыт В.П.Баишев кыһыл көмүс, үрүҥ көмүс уонна боруонса солотуулаах мэтээллэри кэтэттэ уонна бары кыттааччыларга анал бириис туттартаата. Онон күрэхтэһии кыттыылаахтара уонна тэрийээччилэрэ Ньукуолун күн самаан сайыны көрсө “Доҕордоһуу” түмэл туонатыгар өссө биирдэ мустан күрэхтэһии тэрийиэхпит диэн үөрэн-көтөн тарҕастыбыт.

Киһи аймах хас эмэ тыһыынча сыл анараа өттүгэр айбыт уонна күн бүгүҥҥэ диэри сайыннаран аҕалбыт өй-мэйии муҥуутуур оонньуутун таптаан, сайыннарын, дьарыктаныҥ!